Беларуская дзяржаўная акадэмія музыкі і міжнароднае супрацоўніцтва

Міжнародная дзейнасць Беларускай акадэміі музыкі з’яўляецца важным фактарам яе прызнання ў якасці адукацыйнага, творчага (музычнага), навуковага і метадычнага цэнтра міжнароднага ўзроўню, спрыяе развіццю супрацоўніцтва Акадэміі музыкі з замежнымі навучальнымі і навуковымі ўстановамі і, гэткім чынам, садзейнічае прапагандзе і распаўсюджванню нацыянальнага музычнага мастацтва ў замежжы. 

Беларуская дзяржаўная акадэмія музыкі супрацоўнічае, у тым ліку на падставе міжвузаўскіх пагадненняў, з Маскоўскай кансерваторыяй імя П. Чайкоўскага, Санкт-Пецярбургскай кансерваторыяй імя М. Рымскага-Корсакава, Казанскай кансерваторыяй ім. Н. Жыганава, Эстонскай і Літоўскай акадэміямі музыкі і тэатра, Акадэміяй музыкі імя Ф. Шапэна ў Варшаве і Акадэміяй музыкі імя К. Ліпіньскага ў Вроцлаве (Польшча), Уханьскай кансерваторыяй, Хэнаньскім універсітэтам (г. Кайфын) і  Універсітэтам у Чжэнчжоў (КНР)  і інш.

 У Беларускай дзяржаўная акадэміі музыкі паспяхова ажыццяўляецца падрыхтоўка замежных студэнтаў з краін далёкага і  бліжняга замежжа – Арменіі, Бельгіі, Іспаніі, КНР, Малдовы, Расіі, Украіны. Усяго колькасць замежных студэнтаў складае каля 200 асоб.

Беларуская дзяржаўная акадэмія музыкі з'яўляецца членам шэрагу міжнародных музычных арганізацый, менавіта: АЕС (Еўрапейская асацыяцыя кансерваторый і вышэйшых музычных школ, г. Амстэрдам, Нідэрланды), EPTA (Еўрапейская асацыяцыя педагогаў фартэпіяна, г. Лондан, Англія), CWA (Сусветная асацыяцыя цымбалістаў, г. Будапешт, Венгрыя) і інш. Беларуская акадэмія музыкі супрацоўнічае з ISME (Міжнародны савет па музычнай адукацыі UNESKO) і інш. Вялікі міжнародны рэзананс атрымаў Сусветны кангрэс цымбалістаў, правядзенне якога стала магчымым дзякуючы высокім творчым дасягненням айчыннай школы цымбал. Беларуская дзяржаўная акадэмія музыкі прымае актыўны ўдзел у працэсе інтэграцыі еўрапейскай і сусветнай адукацыйнай прасторы ў адпаведнасці з Балонскай Дэкларацыяй па прафесійнай музычнай адукацыі ў Еўропе.

Даведачныя матэр'ялы пра Беларускую акадэмію музыкі змешчаны ў аўтарытэтных выданнях, у тым ліку ў Энцыклапедычным слоўніку г. Окленда (Новая Зеландыя), International Handbook of Universitі es (Францыя), Міжнародны біяграфічны слоўнік Кэмбрыджа, каталагах ELIA, ICFAD, "Piano Journal" EPTA і інш.